دەربارەی ئێمە

پەیڕەوی ناوخۆی
سەنتەری دیراسات و توێژینەوە و
ئەكادیمیای پارتی

بە پشت بەستن بە ماددەی 18 برگەی سێیەم لە پەیرەوی ناوخۆی پارتی دیموكراتی كوردستان پەسەندكراوی كۆنگرەی سێزدەی پارتی، ئەم پەیڕەوە تایبەتە بە سەنتەری دیراسات و ئەكادیمیای پارتی بە مەبەستی دیاریكردنی سیستەمێك بۆ رێكخستنی كاری سەنتەر و دیاریكردنی ئەرك و سنووری دەسەڵاتەكانی سەنتەر كە لەگەڵ چواچێوەی سیاسەتی گشتی و پەیرەوی ناوخۆی پارتیماندا بگونجێت.

ماددەی یەكەم/
پێناسەی سەنتەری دیراسات و توێژینەوەو ئەكادیمیای پارتی :
بریتییە لە یەكێك لە ئۆرگانە تایبەتمەندەكانی مەكتەبی سیاسی پارتی ، بەپێی بەرنامەو نەخشە وپلانێكی تایبەت كاردەكات و رۆڵی سەرەكی دەبینێت لە دیراسەكردن و توێژینەوەی لەبار و گونجاو سەبارەت بە پرسە گرنگ و هەنوكەیی و ستراتیژیەكان، هەروەها رۆڵی تایبەت دەبینێت لە گەشەی مرۆیی و‌ ئامادەسازی و پێگەیاندنی ئەندام و كادیرانی پارتیمان لە سەرجەم بوارە تایبەتمەندەكان بۆ ئایندەی رێكخستنەكانمان و جومگە سەرەكیەكانی حكومەت بە جۆرێك كە لەگەڵ سیاسەتی گشتی پارتیمان بگونجێت بە ئالیەت و شێوازی نوێی سەردەمیانە.

ماددەی دووەم /
- ئامانجەكانی سەنتەری دیراسات و توێژینەوەو ئەكادیمیای پارتی:
1 – پێدان و دەستەبەركردنی زانیاری لە بوارە جیاجیاكاندا بۆ سەركردایەتی پارتیمان.
2-گرنگیدان بە زانستە سیاسی و ستراتیژیەكانی سەردەم و گۆرانكاریە ناوچەیی و جیهانیەكان، لە رێگای توێژینەوەو دیراساتی هەمەجۆر.
3- هەوڵدان بۆ وشیار كردنەوەی كادیرانی پارتیمان، لەو گۆڕانكاریە سیاسی و زانستیانەی لەسەر ئاستی هەرێم و ناوچە و جیهاندا سەرهەڵدەدەن.
٤- كۆكردنەوەی بانكی زانیاری و شرۆڤەی دۆسیەی هەمەجۆری هەستیار.
5- پێكەوە بەستنەوەی سەركردایەتی و گشت ئاستی ڕێكخستنەكانی پارتیمان، لە ڕێی ئەو زانیارییە شرۆڤەكراوانەی سەنتەری دیراسات و توێژینەوە و ئەكادیمیا، كە لە ناوەندەكانی حیزبەوە پێی دەگات.
6- شیكردنەوەی هەموو ئەو هاوكێشە ناوخۆیی و ئەگەر و قەیرانە سیاسی و ئابووری وكۆمەڵایەتیانەی كە ژیانی ئاسایی كۆمەڵگە پەكدەخەن.
7- ئامادەكردنی كادیر بە مۆراڵی سەردەمیانە و لێهاتوو، بۆ بوارە جیاكانی كاركردن.
8- ئەنجامدانی لێكۆڵینەوە و راپرسی بەردەوام سەبارەت بە رەوشی ناوخۆی حزب و ئاستی جەماوەری پارتیمان.
9- دەستەبەركردنی ناوەندێكی بڵاوكراوەیی زانستی و ئەكادیمی، بە مەبەستی بڵاوكردنەوەو گەیاندنی هوشیاری و هزری سەردەمیانە.
ماددەی سێ‌ یەم/
- سەنتەری دیراسات و توێژینەوەو ئەكادیمیای پارتی پێكدێ‌ لە :

1- بۆردی راوێژكاری زانستی.
2- بەشی دیراسات و توێژینەوە .
3- بەشی ئەكادیمیای پارتی .
4- بەشی راگەیاندن.
5- بەشی پەیوەندیەكان.
6- بەشی چاپەمەنی وبڵاوكراوە.
7- بەشی پەرتوكخانە و ‌ئەرشیف.
8- بەشی كارگێری .
9- بەشی دارایی.

• بۆردی راوێژكاری زانستی
بریتیە لە بۆردێك بۆ كۆكردنەوەی توانا مرۆیی و زانستی و ئەكادیمییەكانی پارتی لەناو زانكۆ وپەیمانگاكان و ناوەندە هزریەكانی دیكەدا، بۆ سوود وەرگرتن لە پسپۆری و بەكارخستنی هێزی مەعریفییان لە گشت ئەو بوار و پرۆژانەی كە سەنتەر پێویستی پێ دەبێت.

ئەركەكانی بۆردی راوێژكاری:
1. لە بابەت و پرسی جیاوازدا بەپێی پسپۆری، سەنتەر راوێژیان لەگەڵدا دەكات .
2. لە داڕشتنی پلانی ساڵانەی خۆی سەنتەر راوێژیان لەگەڵدا دەكات .
3. بۆ داڕشتن و میتۆدی خولەكانی ئەكادیمیا، سەنتەر سوود لە توانا وهزریان وەردەگرێت.
4. ئامادەكردنی پرۆژەی جیاوازی زانستی و هزری سەنتەر، پاش پەسەندكردنی لە لایەن كۆبوونەوەی سەنتەر دەخرێتە بەرنامەی كاری سەنتەر.
5. هەموو ئەو ئەركانەی سەرەوەی بۆرد، بە هەماهەنگی لەگەڵا بەرپرسی سەنتەر و بەشە پەیوەندارەكانی سەنتەر ئەنجام دەدرێن.


• بەشی دیراسات و توێژینەوە
ئەم بەشە لە سێ یەكە پێكدێت :
أ/ یەكەی دیراسات و توێژینەوە :
1- هەڵدەستێت بە دیراسە و توێژینەوەی پرسە ‌هەنوكەیی و ستراتیژی و گۆڕانكارییەكان لەسەر ئاستی ناوخۆ و دەرەوە, كە گشت بوارەكانی پەیوەست بە حزب و حكومەت و پەرلەمان و دۆخی سیاسی و یاسایی و دیپلۆماسی و ئابووری و هەرێمایەتی و جیهانی بگرێتەوە .

ب/ یەكەی ئامار و راپرسی :
1- هەڵدەستێت بە ئامادەسازی بۆ سەرجەم ڕاپرسییە پێویست و هەنووكەیی و ئایندەییەكان.
2- كۆكردنەوە و بەدەستهێنانی هەموو ئەو داتاو زانیاریانەی كە پێویستن بۆ دیراسە و توێژینەوە.

ج/ یەكەی بەدواداچوون و شرۆڤە:
1- هەڵدەستێت بە بەدواداچوون و شیكردنەوەی پرسە هەنووكەییەكان و سیاسەتی رۆژانەی ناوخۆ و وڵاتانی دەوروبەر و ناوچەكە و هەموو ئەو وڵاتانەی كاریگەرییان لەسەر ئایندە و چارەنووسی كوردستان هەیە.
2- شیكردنەوە و بەدواداچوونی هەموو ئەو گۆڕانكاری و رووداوو ململانێ و قەیرانانەی لە نێوان وڵاتانی ناوچەكە و هێزەكانی ناوخۆ و دەرەوەدا روودەدەن.


• بەشی ئەكادیمیای پارتی
هەڵدەستێت بە ئامادەكردنی ڕەشنووسی بەرنامە و نەخشەو پلانی تایبەت بۆ پێگەیاندن و ئامادەكردنی كادری لێهاتوو بۆ سەرجەم بوارەكان لە رێگەی ئەنجامدانی خولی جیاجیا بەپێی پێویست بە میكانیزم و شێوازی نوێی سەردەم، بە جۆرێك رێژەیەكی زۆری كادران لە رووی پێگەیاندن لە ئامێزبگرێت .

ئەم بەشە پێكدێت لە سێ یەكەی سەرەكی :
أ/ یەكەی پرۆگرام :
1- هەڵدەستێت بە دیاریكردن و ئامادەكردنی پرۆگرامی خولەكانی پێگەیاندنی كادیران بۆ سەرجەم ئاست و قۆناغەكان لەژێر چاودێری بەرپرسی سەنتەر و راوێژ لەگەڵ ئەنجوومەنی زانستی و بەرزكردنەوەی بۆ مەكتەبی سیاسی.
2- دیاریكردنی مامۆستایان و وانەبێژانی خولەكانی پێگەیاندنی كادیران, بە رەچاوكردنی تایبەتمەندی خولەكان و گونجاوی توانا و پسپۆڕی وانەبێژەكان.

ب/ یەكەی تۆمار و وەرگرتن:
1- هەڵدەستێت بە دانانی رێنمایی و مەرجی پێویست بۆ وەرگرتنی ئەندامانی خولەكان و سەرپەرشتی كردنی پرۆسەی وەرگرتنیان.
2- تۆماركردنی سەرجەم داتا و زانیاریەكانی تایبەت بە قوتابیانی وەرگیراوی خولەكان و تۆماركردنی نمرەكان و ئامادەكردنی بروانامەكانی دەرچوونیان .
ج/ یەكەی بەرێوەبردنی خول:
1- بەرپرسە لە دانانی پلان و جێبەجێ كردن و ئاراستەكردن و بەدواداچوونی سەرجەم ئەو رێنماییانەی كە تایبەتن بە بەرێوەبردنی خولەكانی پێگەیاندنی كادیران لە رووی شوێن و پێداویستی و رێكخستنی خولەكان، هەروەها دەستنیشانكردنی كەموكوڕی و چارەسەركردنیان و ئامادەكردنی ئاهەنگی دەرچوونی قوتابیان بە سەرپەرشتی بەرپرسی سەنتەر و بە هەمەهانگی لەگەڵ بەشەكانی دیكەی سەنتەر.
2- ئامادەكردنی پەیرەوێكی تایبەت بە قوتابیانی وەرگیراوی خولەكە و چاودێری و هەڵسەنگاندنیان لە رووی پابەندبوونیان بە ڕێنماییەكانی خول.

د/ یەكەی ئەزموونەكان:
1- بەرپرسە لە دیاریكردنی كات و شوێنی تاقیكردنەوەكان و ئامادەكردنی چاودێر بۆ هۆڵەكانی تاقیكردنەوە، هەروەها سەرپەرشتی راستەوخۆی لێژنەی تاقیكرنەوەكان دەكات .
2- بەرپرسە لە پاراستنی پرسیارو پەراوی تاقیكردنەوەكان و راگەیاندنی ئەنجامی تاقیكردنەوەكان.


• بەشی راگەیاندن
ئەم بەشە لە دوو یەكەی سەرەكی پێكدێت :
أ/ یەكەی پەیج و ماڵپەر:
سەرپەرشتی و بەرێوەبردنی پەیجی فەرمی و ماڵپەری سەنتەری دیراسات و توێژینەوە و ئەكادیمیای پارتیمان لە ئەستۆ دەگرێت .

ب/ یەكەی چالاكیەكان:
بەرپرسە لە راپەراندن و سەرپەرشتی كردنی سەرجەم چالاكیەكانی سەنتەر لە بواری راگەیاندنەوە.


• بەشی پەیوەندیەكان
1- دروستكردنی پردی پەیوەندی و هەماهەنگی لە نێوان سەنتەرو سەرجەم ناوندە فیكری و زانستیەكانی حكومی و حزبی و سەربەخۆكان, لە سەرئاستی ناوخۆ و دەرەوەی كوردستان .
2- دروستكردنی پەیوەندی لەگەڵ سەرجەم ئۆرگانەكانی دیكەی پارتی (ئەنجوومەنی سەركردایەتیەكان و لقەكان و مەكتەبەكان و دەستە و دەزگاكان).


• بەشی چاپەمەنی و بڵاوكراوە:
1- بەرپرسە لە سەرجەم ئەو بڵاوكراوەو چاپكراوانەی كە سەنتەری دیراسات و توێژینەوە و ئەكادیمیا ئامادەی دەكات .
2- وەرگێرانی سەرجەم ئەو كتێب و نامیلكانەی كە لەگەڵ سیاسەتی پارتیمان دەگونجێن.
3- وەرگێرانی ئەو نووسراو و وتارانەی كە دیدگای نووسەرەكانیان لەگەڵ بەرژەوەندی گەلی كوردستان نزیكە و پشتگیری لە رەوایەتی كێشەی نەتەوەكەمان دەكەن .


• بەشی كتێبخانە و ئەرشیف
1- بەرپرسە لە ئەرشیفكردنی هەموو ئەو بەڵگەنامە و چالاكیە نووسراو و بیستراو و بینراوانەی تایبەتن بە سەنتەر و مێژووی پارتی دیموكراتی كوردستان ، كە سەرچاوەو ئامرازێكی گرنگن بۆ توێژینەوە و بەدواداچوون و لێكۆڵینەوە لە كاتی پێویستدا.
2- پۆلینكردن و رێكخستنی كتێب و نامیلكە و گۆڤار و رۆژنامەكان و پاراستنیان.
3- بە ئەلیكترۆنیكردنی سیستەمی بەرێوەبردنی ئەرشیف و كتێبخانە‌.


• بەشی كارگێری:
1- بەرپرسە لە راپەراندنی كاروباری كارگێری سەنتەر و رێكخستنی میلاكات و خزمەتگوزاریەكان.
2- بەرپرسە لە ئامادەكردنی نوسراو و بروسكە بۆ مەكتەبی سیاسی و لایەنە پەیوەندارەكان.
3- ئاگاداركردنەوەی هەڤاڵان لە بڕیار و رێنمایی و راسپاردە و وتەعمیمەكانی مەكتەبی سیاسی.
4- هەماهەنگی تەواوی دەبێت لەگەل بەشی دارایی سەنتەرو راپۆرتی مانگانەی بۆ كۆبوونەوەی ئاسایی ئامادە دەكات.


• بەشی دارایی
1- بەرپرسە بەرامبەر رێكخستنی خەرجیەكان و ئەركە داراییەكانی سەنتەر .
2- بەدواداچوونی هەموو كێشەو پرسە داراییەكانی سەنتەر دەكات.
3- ئامادەكردنی راپۆرتی دارایی مانگانە بۆ كۆبوونەوەی ئاسایی سەنتەر.
4- پەیرەوكردنی پرەنسپی لیژنە بۆ دابینكردنی پێداویستیەكانی سەنتەر.


ماددەی سێیەم/
پرەنسیپە گشتییەكانی كاری سەنتەر
پابەندبوون بە پرنسیپەكانی :
* راوێژكردن لە وەرگرتنی بڕیار.
* بڕیار و رێنماییەكانی سەنتەر و گوێڕایەڵ بوونیان و ریزگرتنی كەمینە لە بڕیار و پێشنیارەكانی زۆرینە و قبوڵكردن و جێبەجێ كردنیان، هەروەها كەمینە مافی سەرنجدان و رادەربرینی هەیە و لە كۆنوسدا تۆمار دەكرێت
* رەخنە و رەخنە لەخۆگرتن لە كۆبوونەوەكاندا.
* یەكسانی دەرفەت و هەڵسەنگاندنی هەڤاڵانی سەنتەر لەسەر دیسپلینی پارتایەتی.
* دەنگدانی نهێنی لەنێو هەڤاڵانی سەنتەر لە كاتی پێویست بۆ یەكلاكردنەوەی هەندێ پرسی تایبەت.